Фристайл устаси. Ўзбекистонлик спортчилардан қишки олимпиадада олтин медаль соҳибасига айланган дастлабки ва ҳозирча ягона спортчи. 1993 йилги жаҳон чемпионати ғолибаси.

1968 йил 1 ноябрда Тошкентда туғилган.

Фристайлнинг чанғи акробатикаси турида юксак натижаларни қўлга киритган. 1992 йил февралида Германиянинг Оберхоффида Жаҳон кубоги мусобақаси ғолиби бўлган. Шундан сўнг икки йил мобайнида жаҳон кубоги босқичларида 18 марта стартга чиқиб, 13 тасида биринчи ўринни эгаллаган.

1993 йили Австриядаги жаҳон чемпионатида зафар қучган ва олтин медаль билан мукофотланган.

1994 йили Норвегиянинг Лиллеҳаммер шаҳрида ўтказилган қишки олимпия ўйинлари тақвимига илк марта киритилган чанғи акробатикаси мусобақасининг саралаш босқичида 12-натижани қайд этгани боис финал босқичида ўз дастурини ҳаммадан аввал намойиш этишига тўғри келган. Шунга қарамай мураккаб машқни мукаммал бажариб, энг яқин таъқибчиси швециялик Мари Линдгренни бир баллдан кўпроқ фарқ билан ортда қолдирган ва олимпиада чемпионига айланган.

1994 йил ёзида Ақшнинг Лейк-Плэсидида машғулот вақтида ўта оғир жароҳат олган. Бироқ кучли ирода эгаси Лина Черязова катта спортга қайтган ва 1998 йилги олимпиадада иштирок этиш ҳуқуқини берувчи йўлланмани қўлга киритиб, Наганода 13-ўринни эгаллаган.

“Меҳнат шуҳрати” ордени, “Ўзбекистон Республикасида хизмат кўрсатган спортчи” фахрий унвони билан мукофотланган.